محمد قائد الحسني

تابعنى على

تسعة أعوام على نكبة شداد..

Tuesday 13 February 2024 الساعة 09:55 am

• مشاركة

يتخذ "شداد الأخرم" من أحد الأرصفة في المدينة القديمة مكاناً له، ليعرض لزبائنه ما جمعهُ من القات.

لا أتذكر أني مررت من ذلك الشارع دون أن أفتش في "كيس شداد" عن أجود ما لديه.

ذات مرة وأنا أُفتش في الكيس، أقبل شخص يكبر شداد في العمر قليلاً، مُكحّل العينين، يلبس دسمالاً تعزياً وعليه كومة مشاقر.. 

ليبدو أن صداقة قديمة كانت تربطه بـ شداد... 

هذا ما لمحته.. 

بدا الرجل مندهشاً لرؤيته شداد..! قائلاً:

.. منو هذا..؟ شداااد..

 اوه.. انا فدالك واااشداد.... 

وين الغيبه.. كم لي منك.. 

افدي عرفك.. اقرب شحبك..

التفت إليه "شداد" وعلامات البهحة تبدو من محياه... 

اوووه...حيا حيا بالحاج "مرشد" رفيق دربي والنضال..

 انا موجود أونا بهذا المفرش وين شروح..! 

 ثم تعانقا عناقاً حاراً..

مرشد: كم لي ما شوفك..؟

انت داري اخر مره شفتوك ياحاج يمكن قبل عشر سنوات، من لما سرقوا (الكَسَب) حقك..؟

هوذاك انت شداد ولا شيبت، بس الجشع حقك شكله زاد... النوب تندي عسل من جهة، والدكان يندي بيس.. وعادك غلقت الفورة تطلب الله اونا بالقات..

شداد: تنهههههد من دااخل قلبه.. 

إيه إيه.. أسألك بالله لا تقلب لي المواجع..

سقى الله زمان العسل والدكان واامرشد.. كانوا معي عشره احمال نوب مش قليل..!

-وين راحوا..؟

خليها على الله..

كله من عيالي الملاعين عيال الملاعين اللي زادوا عليا ايام "البوقه" حقهم في 2011م..

جلسوا فوق راسي..انزل معانا.. انزل معانا.. احشد شارك.. 

مو ننزل نعمل يا عيال..؟

قالوا: ننزل نغير هذا الوضع الفاسد.. هرمنا..

ومكنونا شوف ياباه انت معك هذي النوب كلها المفروض الدولة توفر لك معمل لانتاج العسل وتكون مستثمر كبير، لكن هذي الدوله فاسده ما من ابوها خير.. هيا انتفض.. وان شاء الله بعد هذي -النفضة- مدري الانتفاضة شنندي لك معمل.. ولا عليك.. امشي بعدنا بس.. 

وانا صدقتوهم ومشيتوا بعدهم.. وتركتوا ارضي والنوب والدكان..

 الناس طلبوا الله.. باعوا قات، وزرعوا ارضهم، وانا الارض حقي بقت صلبة وانا بالخيمة مكوزح معاهم..

كنت امكن العجازي حقي: ارسلي بالقات ولا تبيعي بريال، هاتي للثوار يخزنوا يشتدوا عشان يدهفوا هذا النظام الفاسد.... بيني وبينك ياحاج انا راكن على المعمل..

وكل يوم يمكنونا اناشيد ومحاضرات ومسرحيات بالمنصة ومن هذا الهدار..

وعادلك يوم طلع واحد للمنصه وقال: بشرى سااره.. بشرى سااره..

 وانا مخزن بالخيمة.. افتشعتوا من مكاني قمتُ سع الوتر، شليت الرديف حقي قلتوا: اهاه فرجت.. حرام انه المعمل حقي وصل..!

وجلستوا مسنب على رجل منتظر اي حين يطلعوا متحملين المعمل حقي عشان اقفز للمنصة استلمه..

وانه ياحاج طلعت البشرى الساره حقهم قالوا انه واحد من اصحابهم رجم بقنبلة لبيت المحافظ وهرب.. 

 إيه امركم لله والبشاره هذي.. وبعدين فرحين انهم رجموا بالقنبله لبيت الرجال..

شفت المسألة طولت.. قلت مافيش فائدة اشتي ارجع اشوف الارض حقي والنوب والدكان..

مكنونا اصبر انما النصر صبر ساعه..

وهاتلك يومي مسيرات -على قولتهم- لبيوت البلاطجه، وكل يوم مسيرة لبيت واحد منهم ونجلس نشغب قدام بيوتهم ونفجع عيالهم ونرجع... وعلى هذا الرحيل..

وكانوا يمكنونا ياحاج انت بشجاعتك وإقدامك تشبه حمزة بن عبدالمطلب، وانا حقي الجحوه تفتك سع المجشر حق الأوبار واقفز الاول بالمظاهرة، وعادنا كنت ارجم بالصنادل حقي وامشي حافي عشان الاجر مضاعف..

بعد فترة بكروا من صباح الصبح يعلنوا من المنصة..

بشرى سارة.. بشرى سارة.. 

قلت ماذلحين قده الصادقه مابش سفااط.. المعمل بايوصل..

واسمعلك ياحاج طلعت البشرى قالوا المسئول الفلاني يعلن انضمامة لانتفاضة الشباب، 

وانا شقرتوا المسئول اللي طلع المنصه وافتزيتو من راسي لرجلي، حسيت ان كهرباء عمومي مسكتنا..

وشغبتوا بهذا الصوت اللي اعطانا الله.. والله انه هوذا هو... والله انه هو.!

قالوا ايش هو..؟

قلت: اللي سرق الكسب حقي، إلا والله انه هو بعينه وزينه..

وعيالي يغالطوا.. اسكت ياباه عيييب: ميصلحش تقول كذا..

ياباه حتى ولو حصل هو الان قد اعلن براءته من النظام وخلاص، وبعدين ماسرق الكسب حقنا إلا لان النظام هو اللي خلاه يسرق الكسب حقنا والا ماشسرقش..!

 قلت اهااااه..

 هيا ياعيالي حراام لو لقيتم فائده احلقوا دقني بشريم..! حرام ان النوب حقي طاحس مادام وهذا السارق يعلن الانتفاضة على الفساد.. امانه انهم شنفضونا انا وانتم ياعيالي... معشتيش معمل ولاشي، يالله تسلم النوب حقي..!

طفشتوا وطلعت لي الحموضه للحلقوم.. اشتي اهرب والعيال ماخلوناش..

 شويه واشوف مضرابه بالخيمة اللي جمبنا وماتشوف الا الغبار.. قالوا يضربوا مندسين دخلوا بينهم.. خلوا هذيك الخيام فرااش، قمت افارع لقيتوا لي خبطة بحديده بالنخره لوما خرموها.. شوف كيف نخرتي مخروم.. ومن يومها سموني شداد الاخرم.. وبعدها رجعوا يتضاربوا على المنصة، 

قلتوا لهم ياعيالي تتقاتلوا على المنصة هذا وعادكم جالسين بالشارع مامعاكم إلا ثنتين خيام واربعه الواح... كيف لو مسكتم الدولة.؟

..شميتوها حاامض..

ماهيش سابره شاقوم امشي لي..

مكنونا ياباه لا تكن متخاذل.. اصبر.. انما النصر صبر ساعه..

وكلما كنت اشتي اهرب اتفاقد مالي والضمار يمكنونا اصبر باقي زره..

وانا بيني وبينك ياحاج مايعجبناش الباطل كنت اجلس انتقدهم.. وكان معي شيبه نزغه من حق الحجرية اسمه جازم -الله يذكره بالخير- كان يجلس ينصحهم ويندي لهم من هذاك الخبر الطفييح.. بس مايرضوا يسمعوا الخبر حقه..

كنت بس اشوفهم يتفخسسوا جمبي مدي ايش يوسوسوا لعيالي..

قلت للعيال مامعاكم للفخسسه عيييب..؟ الفخسسه مش حق الرجال..

قالوا ياباه بحجر الله تسكت.. الجماعه دخلهم الشك، قدهم يقولوا انكم انت والحاج هذا اللي جمبك تتبعوا الامن القومي، كله بسبب خبركم..!

قلتوا لهم: هيا يفدوا بكم على قحوفي وقحوف هذا الشيبه..

 وخليت العيال لما طلعوا المنصة ينشدوا بهذيك الانشوده اللي تخليك تدهس المزراب وانت مُغَمِّض (لبيك اسلام البطولة كلنا نفدي الحما..) وانا تحشفرتوا للركب والفاحطي..

وصلت القريه اشعث اغبر والكور حقي يضرب لطرف القرية.. سمعتوا العجازي حقي تقول: (إني لأجد ريح شداد) بيني وبينك قاهي مشتاقلي، وانا ياحاج من كثرة الفجائع والمضاريب حق الساحه قاهو (بعلال)..

 وانا اول شي قلت اشتي اشوف النوب حقي..

 وصلت عند النوب ولا عد باقي حبه.. ياغارة الله وين راحت النوب.. قالوا خربت..

 ارجع اشوف الدكان ماباقي الا كراتين فارغين. العجازي صنجا يمكنوها لظهر الحساب لظهر الحساب.. الارض صلبه..! 

طار مالي والضمار..

المهم ياحاج جلست مطنن بالقرية ولا دريت ايش اعمل.. جلست اقرط التحويشه اللي قد كنت جمعتها من ايام (الفساد) قدام قدام..

مادريت الا والعيال روحوا يتهطبلوا..

مابو ياعيالي.. اينه المعمل..؟

قالوا: منك الصبر ومنا الوفاء.. اصبر ياباه..الثوة مستمرة..!

قمت ساوقت ابتهم بالباكورة شفيت غليلي فوقهم ضرب..

ذلحين وااامرشد زي ماتشوف رجعت اشقي عليهم وعلى عيالهم ابيع قات.. زادوا قطعوا عليهم المعاش.. رجعوا حنبتي وانا لا بظهري ولا ببطني.. 

انا ماهو ذنبي..لكن مو نعمل.. الاهبل يحنبك..

انت داري ياحاج مرشد.. انا وعيالي عملنا مثل صاحب الحراثه والبتول..

"هذا واحد قد كان معه حراثه ومعه بتول حامدين الله شاكرين يشتغلوا ومستورين..

 يوم جلسوا بطرف الحول يرتاحوا شويه عشان يرجعوا يواصلوا التليم..

جاء الثور لجمبهم وعمل (ضفعة)..

جلس صاحب الحراثه يفكر وقلب نفسه نيوتن يفكر بالضفعة كيف خرجت من طيز الثور ولمو مارجعت مدخل..

 طلعت براسه فكرة التغيير..

 قال للبتول: ايش رايك تاكل الضفعه هذي واجيبلك الحراثه..؟

البتول فكر.. قال فرصه بايزبط الفقر ويتغير الوضع.. أكل الضفعة..!

ويالله رجع البتول صاحب الحراثه وصاحب الحراثه بتول.. وقاموا يشتغلوا.. 

البتول جلس يوسوس بنفسه ويقول ذلحين هذا الرجال بيفضحنا قدام الناس بيقولهم اننا اكلتُ الضفعه وجاب لي الحراثه.. لالا.. المفروض ياكل ضفعه مثلي عشان مايفضحنا قدام الناس ونكون اكلنا الضفع سوا..

جاء الثور وعمل ضفعه ثاني..

 قال البتول: ايش رايك تاكل الضفعه هذي وارجعلك الحراثه حقك...؟

صاحب الحراثه قال فرصه ارجع حقي الحراثه..

 اكل الضفعه ورجع حقه الحراثه،

.. بعدين جلسوا يفكروا..

 قالوا ذلحين ايش استفدنا من هذي الحركه اللي عملناها..

 انا صاحب الحراثه وانت البتول.. بس اكلنا الضفع.."

افتهملك ياحاج مرشد..

ذلحين انا وعيالي عملنا مثلهم اكلنا ضفع.. وياليت قدرنا نرجع الحراثه...! ضاعت بكلها....؟